Den store variasjonen i topografi, klima, jordsmonn og mennesket sin langvarige bruk av naturen, har gitt Noreg eit stort mangfald av naturtypar. Dei siste femti åra har derimot fleire naturtypar gått sterkt tilbake. Endringar i arealbruk er den viktigaste årsaka til tap av naturmangfald. Nokon av desse naturtypane vi har i Noreg er særleg viktige for det biologiske mangfaldet. Desse naturtypane er anten sjeldne, har eit spesielt rikt plante- og dyreliv eller dei er viktige levestadar for trua artar. Nokon er også geologisk viktige eller er særeigne slik at dei er interessante og verdifulle i lokal, nasjonal og/eller internasjonal samanheng. Med naturmangfaldlova er det mogleg å gi einskilde naturtypar særskilt status og ekstra beskyttelse som utvalde naturtypar.